16

Lausn frá óeðlilegum vallaraðstæðum (þar á meðal óhreyfanlegum hindrunum). Hættulegar dýraaðstæður. Sokkinn bolti

16.1

Óeðlilegar vallaraðstæður (þar á meðal óhreyfanlegar hindranir)

Þessi regla fjallar um vítalausa lausn sem er leyfð frá truflunum vegna dýrahola, grundar í aðgerð, óhreyfanlegra hindrana eða tímabundins vatns:

• Samheiti þessara aðstæðna er óeðlilegar vallaraðstæður, en hver þeirra er skilgreind sérstaklega.
• Þessi regla veitir ekki lausn frá hreyfanlegum hindrunum (annars konar lausn án vítis er heimil samkvæmt reglu 15.2a) eða vallarmarkahlutum eða hlutum vallar (engin lausn án vítis er heimil).

16.1a

Hvenær lausn er leyfð

(1) Merking truflunar vegna óeðlilegra vallaraðstæðna. Truflun er fyrir hendi þegar eitt af eftirfarandi á við:

• Bolti leikmannsins snertir eða er í eða á óeðlilegum vallaraðstæðum,
• Óeðlilegar vallaraðstæður trufla áþreifanlega fyrirhugaða stöðu leikmannsins eða fyrirhugað sveiflusvið, eða
• Boltinn er á flötinni og óeðlilegar vallaraðstæður á eða utan flatarinnar eru í leiklínunni.

Ef óeðlilegu vallaraðstæðurnar eru svo nærri að þær trufla leikmanninn en uppfylla þó ekkert af þessum skilyrðum telst truflun ekki vera fyrir hendi samkvæmt þessari reglu. Sjá Verklag nefnda, hluta 8 og fyrirmynd staðarreglu F-6 (nefndin má setja staðarreglu sem neitar lausn frá óeðlilegum vallaraðstæðum sem einungis trufla fyrirhugaða stöðu).

MYND 16.1a: HVENÆR LAUSN ER HEIMIL VEGNA ÓEÐLILEGRA VALLARAÐSTÆÐNA

• Á myndinni er gert ráð fyrir rétthentum leikmanni.
• Vítalaus lausn er leyfð vegna truflunar frá óeðlilegum vallaraðstæðum, þar á meðal óhreyfanlegri hindrun, ef boltinn snertir eða liggur í eða á aðstæðunum (B1), eða ef aðstæðurnar trufla svæði fyrirhugaðrar stöðu (B2) eða sveiflu.
• Nálægasti staðurinn fyrir fulla lausn vegna B1 er P1 og er mjög nálægt aðstæðunum.
• Vegna B2 er nálægasti staðurinn fyrir fulla lausn á stað P2 og er lengra frá aðstæðunum, því staða leikmannsins verður að vera alveg laus frá óeðlilegu vallaraðstæðunum.

(2) Lausn leyfð alls staðar vellinum, nema þegar bolti er innan vítasvæðis. Lausn frá truflun vegna óeðlilegra vallaraðstæðna samkvæmt reglu 16.1 er einungis leyfð þegar bæði:

• Óeðlilegu vallaraðstæðurnar eru á vellinum (ekki út af), og
• Boltinn liggur einhvers staðar á vellinum, annars staðar en innan vítasvæðis (þar sem eina lausn leikmannsins er samkvæmt reglu 17).

(3) Engin lausn ef augljóslega óraunsætt. Engin lausn er veitt samkvæmt reglu 16.1:

• Ef það væri augljóslega óraunsætt að leika boltanum þar sem hann liggur, vegna einhvers sem leikmanninum er ekki heimilt að taka vítalausa lausn frá (til dæmis ef leikmaðurgetur ekki slegið högg vegna þess hvar boltinn liggur inni í runna), eða
• Ef truflunin er eingöngu vegna þess að leikmaður velur kylfu, stöðu, sveiflu eða leikátt sem er augljóslega óraunsætt miðað við kringumstæður.

Sjá Verklag nefnda, hluta 8 og fyrirmynd staðarreglu F-23 (nefndin má setja staðarreglu sem leyfir lausn án vítis vegna truflunar frá tímabundnum óhreyfanlegum hindrunum, á eða utan vallarins).

16.1b

Lausn vegna bolta á almenna svæðinu

Ef bolti leikmanns er á almenna svæðinu og truflun er vegna óeðlilegra vallaraðstæðna á vellinum má leikmaðurinn taka lausn án vítis, með því að láta upphaflega boltann eða annan bolta falla á þessu lausnarsvæði (sjá reglu 14.3):

• Viðmiðunarstaður: Nálægasti staðurinn fyrir fulla lausn á almenna svæðinu.
• Stærð lausnarsvæðisins, mæld frá viðmiðunarstað: Ein kylfulengd, þó með eftirfarandi takmörkunum:
• Takmarkanir á staðsetningu lausnarsvæðisins:
  • Það verður að vera á almenna svæðinu,
  • Það má ekki vera nær holunni en viðmiðunarstaðurinn, og
  • Full lausn verður að fást frá öllum truflunum vegna óeðlilegu vallaraðstæðnanna.

MYND 16.1b: VÍTALAUS LAUSN FRÁ ÓEÐLILEGUM VALLARAÐSTÆÐUM Á ALMENNA SVÆÐINU

• Vítalaus lausn er leyfð þegar boltinn er á almenna svæðinu og truflun er vegna óeðlilegra vallaraðstæðna.
• Ákvarða ætti nálægasta staðinn fyrir fulla lausn og láta verður bolta falla innan lausnarsvæðisins og leika boltanum síðan þaðan.
• Lausnarsvæðið er innan einnar kylfulengdar frá viðmiðunarstaðnum, er ekki nær holunni en viðmiðunarstaðurinn og verður að vera á almenna svæðinu.
• Þegar lausn er tekin verður leikmaðurinn að fá fulla lausn frá allri truflun vegna óeðlilegu vallaraðstæðnanna.

16.1c

Lausn vegna bolta í glompu

Ef bolti leikmanns er í glompu og truflun er vegna óeðlilegra vallaraðstæðna á vellinum má leikmaðurinn annaðhvort taka lausn án vítis samkvæmt (1) eða lausn gegn víti samkvæmt (2): (1) Lausn án vítis: Leikið úr glompunni. Leikmaðurinn má taka lausn án vítis samkvæmt reglu 16.1b, nema að

• Nálægasti staðurinn fyrir fulla lausn og lausnarsvæðið verða að vera í glompunni.
• Ef enginn nálægasti staður fyrir fulla lausn er í glompunni má leikmaðurinn samt taka þessa lausn, með því að nota stað fyrir mestu mögulegu lausn í glompunni sem viðmiðunarstað.

MYND 16.1c: LAUSN FRÁ ÓEÐLILEGUM VALLARAÐSTÆÐUM Í GLOMPU

• Myndin gerir ráð fyrir rétthentum leikmanni.
• Þegar truflun er vegna óeðlilegra vallaraðstæðna í glompu, fæst vítalaus lausn innan glompunnar samkvæmt reglu 16.1b eða aftur á línu lausn utan glompunnar gegn einu vítahöggi.
• Lausn utan glompunnar er tekin með því að láta bolta falla á stað þar sem staðsetning upphaflega boltans er í beinni línu frá staðnum að holunni.
• Lausnarsvæðið er ein kylfulengd í allar áttir frá staðnum þar sem bolti snerti fyrst jörðu eftir að vera látinn falla.

(2) Lausn gegn víti: Leikið utan glompunnar (aftur-á-línu lausn). Gegn einu vítahöggi má leikmaðurinn láta upphaflega boltann eða annan bolta falla (sjá reglu 14.3) utan glompunnar þannig að upphafleg staðsetning boltans sé á milli holunnar og staðarins þar sem boltinn er látinn falla (án takmarkana á hversu langt aftur á bak boltinn er látinn falla). Staðurinn sem boltinn snertir fyrst á jörðinni þegar hann er látinn falla ákvarðar lausnarsvæði sem er ein kylfulengd í allar áttir, en með þessum takmörkum:

• Takmarkanir á staðsetningu lausnarsvæðisins:
  • Það má ekki vera nær holunni en staðsetning upphaflega boltans, og
  • Það má vera á hvaða svæði vallarins sem er nema í sömu glompu, en
  • Það verður að vera á sama svæði vallarins og boltinn snerti fyrst þegar hann var látinn falla.

16.1d

Lausn vegna bolta á flötinni

Ef bolti leikmanns er á flötinni og truflun er vegna óeðlilegra vallaraðstæðna á vellinum má leikmaðurinn taka lausn án vítis með því að leggja upphaflega boltann eða annan bolta á nálægasta stað fyrir fulla lausn, með því að nota aðferðir við að leggja bolta aftur samkvæmt reglum 14.2b(2) og 14.2e.

• Nálægasti staðurinn fyrir fulla lausn verður að vera annaðhvort á flötinni eða á almenna svæðinu.
• Ef enginn slíkur nálægasti staður fyrir fulla lausn er fyrir hendi má leikmaðurinn samt taka þessa lausn án vítis, með því að nota stað fyrir mestu mögulegu lausn sem viðmiðunarstað. Sá staður verður að vera annaðhvort á flötinni eða á almenna svæðinu.

MYND 16.1d VÍTALAUS LAUSN FRÁ ÓEÐLILEGUM VALLARAÐSTÆÐUM Á FLÖTINNI

• Á myndinni er gert ráð fyrir örvhentum leikmanni.
• Þegar boltinn er á flötinni og truflun er vegna óeðlilegran vallaraðstæðna, má taka vítalausa lausn með því að leggja bolta á nálægasta staðinn fyrir fulla lausn.
• Nálægasti staðurinn fyrir fulla lausn verður að vera annaðhvort á flötinni eða á almenna svæðinu.

16.1e

Lausn vegna bolta sem er í eða á óeðlilegum vallaraðstæðum en hefur ekki fundist

Ef bolti leikmanns hefur ekki fundist og það er vitað eða nánast öruggt að boltinn stöðvaðist í eða á óeðlilegum vallaraðstæðum á vellinum má leikmaðurinn nota þessa lausnaraðferð í stað þess að taka fjarlægðarlausn:

• Leikmaðurinn má taka lausn samkvæmt reglu 16.1b, c eða d, með því að nota áætlaða staðinn þar sem boltinn skar síðast jaðar óeðlilegu vallaraðstæðnanna á vellinum sem staðsetningu boltans, í þeim tilgangi að finna nálægasta staðinn fyrir fulla lausn.
• Þegar leikmaðurinn hefur sett annan bolta í leik til að taka lausn á þennan hátt:
  • Er upphaflegi boltinn ekki lengur í leik og ekki má leika honum.
  • Þetta gildir jafnvel þótt boltinn finnist svo á vellinum innan þriggja mínútna leitartímans (sjá reglu 6.3b).

Hins vegar, ef hvorki er vitað né nánast örugg að boltinn hafi stöðvast í eða á óeðlilegum vallaraðstæðum og boltinn er týndur, verður leikmaðurinn að taka fjarlægðarlausn samkvæmt reglu 18.2.

16.1f

Taka verður lausn vegna truflunar frá bannreit innan óeðlilegra vallaraðstæðna

Í eftirfarandi tilfellum má ekki leika boltanum þar sem hann liggur: (1) Lausn þegar bolti er innan bannreits hvar sem er á vellinum nema innan vítasvæðis. Ef bolti leikmannsins er innan bannreits í eða á óeðlilegum vallaraðstæðum á almenna svæðinu, í glompu eða á flötinni:

• Bannreitur á almenna svæðinu. Leikmaðurinn verður að taka lausn án vítis samkvæmt reglu 16.1b.
• Bannreitur í glompu. Leikmaðurinn verður að taka lausn án vítis eða gegn víti samkvæmt reglu 16.1c(1) eða (2).
• Bannreitur á flötinni. Leikmaðurinn verður að taka lausn án vítis samkvæmt reglu 16.1d.

(2) Lausn þegar bannreitur truflar stöðu eða sveiflu vegna bolta sem er á vellinum, annars staðar en innan vítasvæðis. Ef bolti leikmanns er utan bannreits og er á almenna svæðinu, í glompu eða á flötinni, og bannreitur (hvort sem er í óeðlilegum vallaraðstæðum eða innan vítasvæðis) truflar svæði fyrirhugaðrar stöðu eða svæði fyrirhugaðrar sveiflu verður leikmaðurinn annaðhvort að:

• Taka lausn, ef slíkt er leyft samkvæmt reglu 16.1b, c eða d, eftir því hvort boltinn er á almenna svæðinu, í glompu eða á flötinni, eða
• Taka lausn vegna ósláanlegs bolta samkvæmt reglu 19.

Varðandi hvað eigi að gera ef truflun er vegna bannreits þegar bolti er á vítasvæði, sjá reglu 17.1e. Víti fyrir að leika bolta frá röngum stað, andstætt reglu 16.1: Almennt víti samkvæmt reglu 14.7a..

16.3

Sokkinn bolti

16.3a

Hvenær lausn er leyfð

(1) Bolti þarf að vera sokkinn á almenna svæðinu. Lausn er veitt samkvæmt reglu 16.3b, því aðeins að bolti leikmanns sé sokkinn á almenna svæðinu.

• Lausn er ekki veitt samkvæmt þessari reglu ef boltinn er sokkinn annars staðar en á almenna svæðinu.
• Hins vegar ef boltinn er sokkinn á flötinni má leikmaðurinn merkja staðsetningu boltans og lyfta boltanum og hreinsa hann, lagfæra skemmdina eftir niðurkomu boltans og leggja boltann aftur á upphaflegan stað (sjá reglu 13.1c(2)).

Undantekningar – Þegar lausn er ekki veitt vegna bolta sem er sokkinn á almenna svæðinu: Lausn er ekki veitt samkvæmt reglu 16.3b:

• Ef boltinn er sokkinn í sandi innan almenna svæðisins, þar sem gras er ekki slegið í brautarhæð eða neðar, eða
• Ef það væri augljóslega óraunsætt að leika boltanum þar sem hann liggur, vegna einhvers sem leikmanninum er ekki heimilt að taka vítalausa lausn frá (til dæmis ef leikmaðurinn getur ekki slegið högg vegna þess hvar boltinn liggur inni í runna).

(2) Að ákvarða hvort bolti er sokkinn. Bolti leikmanns er því aðeins sokkinn ef:

• Hann er í eigin boltafari eftir síðasta högg leikmannsins, og
• Hluti boltans er neðan yfirborðs jarðar.

Ef leikmaðurinn er óviss um hvort boltinn er í eigin boltafari eða í boltafari eftir annan bolta má leikmaðurinn líta svo á að boltinn sé sokkinn ef skynsamlegt er að álykta út frá fyrirliggjandi upplýsingum að boltinn sé í eigin boltafari. Bolti er ekki sokkinn ef hann er neðan yfirborðs jarðar sem afleiðing af einhverju öðru en síðasta höggi leikmannsins, svo sem þegar:

• Boltanum er ýtt niður í jörðina með því að einhver stígur á hann,
• Boltanum er slegið beint niður í jörðina án þess að hann takist nokkurn tíma á loft, eða
• Boltinn var látinn falla við að taka lausn samkvæmt reglu.

MYND 16.3a: HVENÆR BOLTI ER SOKKINN

16.3b

Lausn vegna sokkins bolta

Þegar bolti leikmanns er sokkinn á almenna svæðinu og lausn er heimil samkvæmt reglu 16.3a má leikmaðurinn taka lausn án vítis með því að láta upphaflega boltann eða annan bolta falla á þessu lausnarsvæði (sjá reglu 14.3):

• Viðmiðunarstaður: Staðurinn á almenna svæðinu rétt fyrir aftan staðinn þar sem boltinn er sokkinn.
• Stærð lausnarsvæðisins, mæld frá viðmiðunarstað: Ein kylfulengd, þó með eftirfarandi takmörkunum:
• Takmarkanir á staðsetningu lausnarsvæðisins:
  • Það verður að vera á almenna svæðinu, og
  • Það má ekki vera nær holunni en viðmiðunarstaðurinn.

Sjá Verklag nefnda, hluta 8 og fyrirmynd staðarreglu F-2 (nefndin má setja staðarreglu sem leyfir einungis lausn vegna sokkins bolta ef boltinn er á svæði sem er slegið í brautarhæð eða neðar). Víti fyrir að leika bolta frá röngum stað, andstætt reglu 16.3: Almennt víti samkvæmt reglu 14.7a.

MYND 16.3b: VÍTALAUS LAUSN VEGNA SOKKINS BOLTA

• Þegar bolti er sokkinn á almenna svæðinu er vítalaus lausn leyfð.
• Viðmiðurnarstaðurinn fyrir lausnina er rétt aftan við þar sem boltinn er sokkinn.
• Lausnarsvæðið er innan einnar kylfulengdar frá viðmiðunarstaðnum, er ekki nær holunni en viðmiðunarstaðurinn og verður að vera á almenna svæðinu.
• Láta verður bolta falla innan lausnarsvæðisins og boltinn verður að stöðvast þar.